21‏/09‏/2011

افضل طرق الدهانات للحوائط | سلسة تعليم دهانات المنازل المجانية(الجزء الاول) |The Best Way to Paint Interior Walls

 مقدمة: بسم الله و الصلاة و السلام على رسول الله صلى الله عليه و على آله و صحبه الكرام الطيبين الى يوم الدين ، اما بعد اعزائى زائرى و محبى ديكورات مدونتى المتواضعة ، أحببت ان اشارككم بعض من خبراتى فى مجال دهانات الحوائط و ذلك بسبب ما يصلنى من استفسارات و تساؤلات حول عملية الدهان و خاصةً الدهانات الديكورية و ايضاً كيفية اختيار الألوان و نصائح لتنفيذ الديكور الداخلى للمنازل و أسئلة و استفسارات كثيرة سواء من الزبائن او اصحاب الحرفة (النقاشين) فكلٌ له استفساره حول ما يحتاج من معلومات تفيده فى عملية الدهان (الطلاء) بالنسبة لغرفة او لشقة بكامل جدرانها ، و احاول بمشيئة الله ان يكون هذا الموضوع هو الاشمل و الوافى لشرح افضل الطرق لدهانات و ديكورات الشقق و المنازل...
أولاً...
شقة لم ينفذ لها عملية الدهان(الطلاء) بالبويات من قبل اى شقة على المحارة .
  •  الادوات و العدد المستخدمة فى معجون الجدران: عدد 2 سكين معجون و سكينة رشمة و مكنسة يدوى (مقشة) و على الاقل 2 رول قابلة للزيادة و زانة اى عصا للرول كما سنشاهد بالصور كل التفاصيل ، سلم او اثنان ان وجد ، لوح خشب (سقالة) ان وجد ايضاً و اهم شىء نظارة للرشمة و هى نظارة بلاستيكية بيضاء و حجر جلخ (صوان) .
  • الخامات بمعظم أنواعها: اولاً خامات التأسيس (التجليخ على المحارة و المعجون) و لمن لا يعرف معنى تجليخ الصور ستوضح و هو طلاء السيلر بإستخدام الرول او البروش (الفرشاه) او الرش على المحارة مباشرةً و طبعاً بعد الرشمة ،رشمة؟تجليخ؟ ما هذه اللوغريتمات ؟ سنوضح فى السطور القادمة فلا تتعجل .
  • "حسب مساحة الشقة و لتكن فرضاً 120 مترأ "
  • حين ذاك نحتاج لعدد 2 بستلة سيلر.
  • و تقريباً من 15 الى 20 شيكارة معجون اكريلك (جى ال سى G L C ) و حسب الطلب ( حسب نعومة او خشانة المحارة اى البياض الاسمنتى الاسود على الجدران) قد تحتاج ايضاً لشيكارة او اثنان لمعجون سوبر الممتاز (حسب المحارة) يعنى لو مساكن شعبية و شغل مقاولين هتبقى محارة مرعبة "قصة قصيرة: عملت شقة فى مساكن الكوثر بالسويس غرفتين و صالة تقريباً مساحة 65 او 67 متر مربع أخذت 20 شيكارة اكريلك + 3 شيكارة معجون سوبر الممتاز" و لمزيد من التفاصيل حول سوبر الممتاز و خواصه اضغط هنا.
  • الوان للمعجون و ليكن بنى او اصفر جملى (اكسيد) او اى لون انت تختاره او تحبه .
  • صنفرة مقاس100 و مقاس 120، بالمتر او بالكيلو يكفينا نصف كيلو عريض من كل مقاس (انا افضل بالكيلو) و اذا لم يوجد فاشترى مبدئياً 5 متر من كل مقاس + 5 فرخ صنفرة دوكو 220 .
هذه الخامات قابلة للزيادة بمعنى ربما نحتاج عليها او ربما يتبقى منها فلا تقلق يمكنك ارجاعها و افضل ان تبدا ب 15 شيكارة معجون اذا لم تسحب السقف فهى مسألة تقريبية تقديرية ، هل وضحت الرؤية؟

 طريقة التنفيذ:
  • اولاً الرشمة : هى عبارة عن ازالة الزيادات من على الحوائط بسكين معجون صلب  و حجر جلخ للزلط و ربم شاكوش (مطرقة) و بعد ذلك نقوم بتنظيف الحائط اى كنسه بالمكنسة اليدوى (المقشة) و ازالة الرمال و الاتربة قدر المستطاع من عليه و سيتبقى بعض الاتربة و الرمال عليه و هذا طبيعى فلا تشغل بالك الحل فى الخطوة التالية.
  • ثانياً التجليخ او الطلاء بالبادىء (السيلر او البرايمر المائى): اولاً نخفف السيلر بالماء و ستجد على كل بستلة سيلر ارشادات الاستخدام و مقدار الماء الذى يخفف به (ملحوظة يجب التنبيه انه يوجد سيلر آخر يخفف بالثنر و يستخدم للأخشاب و هو ليس موضوعنا اليوم فانتبه للفرق بين الاثنين) موضوعنا هو السيلر المائى و ان افضل الا اخففه كثيراً فأفضل استخدامه ثقيل و هذا افضل من وجهة نظرى مع ان البعض من النقاشين لا يستخدمون السيلر اصلاً ، و لكننا هنا نحب ان تكون المواضيع فى مكانها الصحيح ، نرجع للمهم بعد التخفيف نكون قد وضعنا الرول فى ماء نظيف آنفاً لتلين بعض الشىء  (هذه الخطوة غير مهمة الآن و لكنى آخاف من عباقرة النقد فانوه على ادق التفاصيل) و نضع الرول فى الزانة (العصا) ثم نقوم بتجليخ الجدران(الحوائط) من تحت لفوق زى الاغنية بالظبط يتبقى الخطوة التالية و الاخيرة بالنسبة لعملية المعجون.
دهان سيلر لحائط على المحارة (تجليخ)

    ملحوظة مهمة جداً: غالباً ما يكون هناك شروخ (تشققات) بالحائط و يمكنك الاتطلاع على هذا الموضوع عن شروخ الجدران(...)
    • ثالثاً كيفية طلاء المعجون على الجدران: 
     اولاً نظف العدة و الأدوات و صنفر سلاح سكاكين المعجون و خاصةً التى تطلى(تسحب) بها المعجون ثم افعل هذه العملية بعد كل سكينة معجون (طبقة معجون) لا تنسى ذلك و احياناً ما تصطدم سكين المعجون برايش او زلطة فى المحارة و كما نقول تجرح و يظهر ذلك فى سحب المعجون (خد بالك) انتبه و صنفر السلاح جيداً بالصنفرة مقاس 120 او 100 و من ثم نعم السلاح بالدوكو (آه احنا تقريباً جايبين الصنفرة علشان سكاكينكو ده الزبون هيقولك كده)ههههههه ، يا عم ابقى اشتريهم على حسابك...

     اولاً السكينة الاولى...
    تفرغ شيكارة المعجون فى وعاء(بستلة فارغة) له غطاء ثم نأخذ المعجون بسكين و نضعه على الاخر فى نصف السكين الاخر تقريباً و سأستعير فيديو من اليوتيوب ليوضح لك كيف تقوم بذلك فأظن اننى هنا أخص بهذا الدرس تحديداً الهواة فليسامحنى المحترفون ، ثم نبدأ بسحب المعجون من اسفل الى اعلى و اذا استطعت ان تعكس ما سحبته من اسفل الى اعلى الى من اعلى الى اسفل اى تعيد عليه حتى يمتلىء الثقوب الصغيرة الذى يسميها معظم النقاشين سوس فسيكون افضل اما اذا لم تستطع فوفر مجهودك و مالك حتى لا يقع المجون على الارض بكثرة ، الطبيعى ان يقع منك معجون لكنى لا اقصد كل المعجون بل القليل القليل فقط فانا هنا اتكلم عن طلاء الجدران و ليس ارضية المنزل ، المهم نقوم بالسحب و تكون السكينة فى وضعية 45 درجة تقريباً (هل تحتاج لمثلث؟) بالطبع لا فهى مسألة تقديرية يكفى هذا القدر ، لكن ما احب ان اشير اليه ان المعظم يفضل طلاء السكينة الاولى بطول الحائط (ارتفاعه) وهذا ما افعله ايضاً و لكن لاضرر فى ان تسحب الحائط بالعرض فى هذه المرحلة عادى جداً ، المهم ان كل سكينة تكون عكس الاخرى ( مع العلم ان الشقة التى كلمتكم عنها فى قصتى القصيرة الشهيرة سحبت اول سكنتين طول و عجبى:)

    ثانياً السكينة(الطبقة) الثانية...
    نفرغ الشيكارة فى البستلة و تكون نظيفة جداً و لها غطاء بحيث ناخذ منها و نغطيها و هكذا ثم نلون المعجون بأى لون نحب ثم نراشم الحائط جيداً من زيادات و تعاريج (ريجة) السيكنة الاولى و البعض يصنفر الحائط و هذا اكبر خطأ لأن الصنفرة تصنع الاتربة على الحائط و تكون الاتربة بمثابة عازل فأنا عن نفسى افضل الرشمة فى هذه المرحلة ، بعد ذلك لا ضرر ان ننظف الحائط جيداً بمكنسة يدوى ثم نشرع فى العمل و نسحب بالعرض (عكس الاولى) و ايضاً ذهاباً و اياباً شمال و يمين علشان السوسة (:
    معجون حوائط(سكينة ثانية)|wall putty
    wall putty formula|معجون حوائط (جدران)

    ُُُُُُثالثاً السكينة (الطبقة) الثالثة...
    و هى مثل الاولى بيضاء (اى لا تلون) و تسحب بالطول ، الفكرة اننا نعكس كل سكينة عن الاخرى و انا اعرف بعض الناس يسحبون اول سكينة ع المحار عرض و الثانية طول ، اما لو اردت سحب الحائط 4 سكاكين (اى اربع طبقات معجون) فيمكنك تلوين الاولى و سحب السكينة الثانية بيضاء ثم الثالثة ملونة و الرابعة بيضاء و انا غالباً ما افعل ذلك لأنى افضل ان تكون آخر سكينة قبل البطانة بيضاء على اى حال ظبطها بمعرفتك.
    معجون حوائط(سكينة ثالثة) | wall putty coating 3

    رابعاً معجون السقف...
    نقوم بعمل صنفرة ناعمة للسقف و يمكننا استخدام الصنفرة الدوكو اما للأركان فصنفرة من القماش الحمرة مثلاً 120 و تستخدم اذا كان السقف خشن و به بروز و رايش مصيص (كلاكيع) ثم ينظف بالمكنسة اليدوى ثم يجلخ و انا غالباً ما اجلخه سانيتون ليجعله صلباً و احياناً بلاستيك و سيلر و غراء ابيض و هذا اذا كان الجبس المصيص مقتول اى السقف ضعيف لا يتحمل المعجون و هذا شىء معقد بعض الشىء و انصحك فى هذه المرحلة ان تستعين بصديق. ثم نتبع الخطوات التى اتبعناها فى معجون الحوائط (الجدران) و لكن اولاً صنفر سلاح سكينة المعجون بعد كل طبقة معجون.
    كان هذا شرحى المتواضع و اى استفسار اترك تعليقك سواء عن طريق نموزج تعليق الفيس بوك او صندوق تعليقات المدونة او اتصل بنا ، سعدت بكم و ارجو ان اكون عند حسن ظنكم
    انتظروا الجزء الثانى من سلسة تعليم دهانات المنازل المجانية.




    24 comments:

    انا شقتى كانت قديمه ومعموله زيت وبجددها وعملت الكرانيش هل الاقضل انها تتمعجن كلها ولا تتلقط بس وبجد شكرا

    ارجو ترك اسمك يا اخ غير معرف@
    الافضل انها تصنفر جيداً و تنظف من الاتربة ثم تطلى بطبقة من السانيتون و هو طلاء زيتى مط تطلى كلها بطبقتين من المعجون و هذه هى الطريقة المثلى لعزل الطلاء الزيتى القديم لاننا نطلق عليه طلاء زفر....

    انا اسمى سامر وانا احب اشكرك جدا ع المعلو مات الى بتديهالنابس انا كنت عاوز توضيح اكتر هو حضرتك تقصد السانيتون ولا السيلار الى هو برايمر زى ماكان فى الخطوات المشروحه ولو ممكن اعرف الفرق بينهم وامتى نعمل السيلار وامتى السيناتون وبالنسبه لشقتى هى 96متر كنت عاوزه اعرف تتكلف كام عشان تتعمل صح وياريت التكاليف تشمل الخامات الى هنستخدمها وشكرا اوى لحضرتك

    اهلاً و سهلاً @سامر
    # انا اسمى سامر وانا احب اشكرك جدا ع المعلو مات...
    العفو، ارجو ان اكون عند حسن ظنكم بى، و بالنسبة للسانيتون فهو افضل للبطانة فوق الدهان الزيتى القديم، و لا افضل استخدام السيلر المائى فى هذه الحالة السانيتون افضل، اما بالنسبة للاسعار ففى حالة الصيانة للمنازل فيجب عمل معاينة للمكان و تكلفك المعاينة 200 جنيه للقاهرة...

    السلام عليكم شكرا جزيلا للمعلومات الرائعة وكل عام وانتم بخير اود ان اسال هل معجون جي ال سي الاكريليك هو معجون جاهز ام عبارة عن بودرة تحتاج الخلط بالماء لتجهيزها ؟

    و عليكم السلام و رحمة الله و بركاته و كل عام و كل الامة الاسلامية و العربية بخير و هناء و سعادة....
    معجون جى ال سى هو معجون جاهز و يستخدم مباشرة على الجدران دون اى اضافة عليه و ان كنت تستخدمه فى الشتاء فاترك الشيكارة او البستلة فى الشمس لبعض الوقت حتى يكون سلساً فى عملية سحب المعجون لان الجو الرطب او البارد يجعل المعجون صعب المراس ، كما ان هناك معجون بودرة و يسمى الممتاز و سوبر الممتاز و سافيتو و هو معجون جبسى و الاخير اسمنتى....

    هل الطريقة دى تنفع اننا نعملها على حائط متبيض مسبقا ولا هنحتاج لحاجات تانية فانا عايزة البياض مش وضع المعجون من فضلكم

    اهلاً بك سيدتى الفاضلة...
    تقصدين طريق طلاء الجدران السابق طلاءها..(صيانة) يمكنك الاطلاع على هذا الموضوع و قريباً ساسرد موضوع اشرح فيه كيفية طلاء الجدران السابق طلاءها..
    http://dekorat.blogspot.com/2012/05/best-way-to-paint-interior-walls-part-3.html
    انسخ و الصق فى متصفحك
    شكراً لسعة صدرك

    احنا فى مساكن شعبية وعندنا الحوائط على الاسمنت والسقف بالخشب فهل ممكن دهان الحوائط الأسمنتية باللون على طول دون معجون عشان الشكل العم وبس .. والسقف يدهن ازاى ؟ وجزاك الله كل الخير

    اجابة سؤال الاخ المقيم بالمساكن الشعبية:
    -------------------------------------
    اولاً ارجو ترك الاسم لكى يشير الى صاحب السؤال....
    نعم يمكنك القيام بعملية الطلاء لتوفير الوقت و المال، اما بالنسبة للسقف الخشب فيفضل ان يتم طلاءه بدهان زيتى(لاكيه) اما الاوفر فطلاء بلاستيك اقتصادى و يمكنك سحب معجون او بالبلدى لو عايز تلم الدور يبقى دهان على طول...

    بعد التحية اسمى محمد يوسف لاننى من مستفيدى ابنى بيتك 6 اكتوبر و قد استنفد البناء و التشطيب و سرقة المقاولون كل ما املك و الان قد وصلنا الى المحارة و السراميك فلو اردت ان اسكن على هذا الوضع هل يكفى عمل معجون فقط فوق المحارة لاعطاء لون فاتح بدلا من اللون الاسمنتى للمحارة و هل سيكون ثابت ام مثل الجير يلتصق باى شئ يلمسة و ما هى حدود الخامات علما بان الشقة 75 متر و بماذا تنصحنى

    سؤال للاخوة الخبراء لاننى من مستفيدى ابنى بيتك 6 اكتوبر و انوى الانتقال للسكن و لاننى استنفذت كل ما معى فى البناء و التشطيبات حتى وصلت للمحارة فهل يمكن ان نكتفى بالمعجون فوق المحارة بشكل مؤقت من باب ان يكون لون الحوائط فاتح بدلا من اللون الاسمنتى للمحارة و هل سبات المعجون جيد على الحوائط ام يشبة طلاء الجير و ما هى نصيحتكم لى و شكرا

    السيد
    انا بقا نفسى وعايز اتعلم النقاشة عشان تبقى مصدر رزق لى بجانب عملى لأن المرتب مبيكفيش خالص (الحمد لله على كل شيئ) بس احنا بنسعى ونعمل اللى علينا والباقى على ربنا ياريت لو تقدر تفدنى

    لو سمحت انا السقف عندى لسه عملله صيانه وفجاة انه شرب مياه من الناس اللى فوقيه لانهم حطين فى الارض مشمع جلد فظهر عندى فى السقف فقفيع ماذا افعل اصنفرثم امعجن وبعدين اديها وش بياض ولا ايه للعلم انا سوف افعل كده بنفسى فيريت الطريقه تكون سهله

    انا عامل شقتى كلها زيت وكنت عايز احولهالبلاستيك هل ادهن على طول فوق الزيت ولا فيه خطوات اخرى يعنى مثلا ممكن السيلر يتحط فوق الزيت ارجو الرد وجزاك الله كل خير وجعل مجهودك فى ميزان حسناتك ان كنت مسلم او غير ذلك

    حسام الموشى

    يجب طلاء سانيتون او اى طلاء زيت مط اولاً ،اقرأ الموضوع ده http://dekorat.blogspot.com/2012/08/how-to-repaint-old-wall.html

    ام ادهم افعلى كما تقولين و لكن يجب منع الرطوبة اولاً من مصدرها

    يا باش مهندس لو سمحت انا باشطب شقه بنتي وظروفنا شويه مش مبحبحه الحمد لله وبنحاول نوفر فسؤالي ممكن بعد المحاره نبيض بلاستيك من غير معون ولو ممكن ده ايه المطلوب علشان الشغل يبقي شكله حلو وربنا يكرمك رد علي بسرعه علشان محتاجه ابدا في الشقه

    ازيك يا عم رجب
    رداً على سؤالك يمكنك فعل ذلك و لكن يجب القيام بتنظيف الحائط جيداً ثم طلاءه بالسيلر المائى ثم او طبقة دهان يفضل ان تكون بها سيلر + بلاستيك اقتصادى كسوبر دايتون او 666 من باكين، و لكنى افضل ان تقوم بسحب و لو سكينة معجون واحدة او اثنان لو امكن و لكن اذا اردت التوفير فعليك بالوصفة الاولى و اسف على التأخير فى الرد عليك.
    و السلام عليكم

    انا نقلت فى شقة جديدة والحوائط فيها معجون بس سيىء جدا وغير متساوى وسمعت ان فى ورق حائط سبونش يوضع على الحائط ويتم الدهان عليه عايز اعرف هيكون تكلفته اقل ؟ يعنى الرول بكام تقريبا والورق ده دورت عليه بس مش لاقيه ألاقيه فين بالظبط واسمة ايه عشان لما اطلبه من البائع؟ وفى حالة وضع الورق ده على الحائط اتصرف ازاى فى السقف؟

    السلام عليكم لو سمحت عايز اعرف طريقة عمل ومكونات المعجون البلدى بالمقادير

    انا شقتى فيها مشكلة بسبب السقف المصيص تيجى تمعجن عليه يقشر ودا طبعا ادهن قبل كدا بس مرة واحدة لقيته شقق اعمل ايه

    تانى حاجة بالنسبة لعمل الطوب ازاى ادهنه
    تالت حاجة بالنسبة لو فيه لون نبيتى وعاوز اغيره اعمل ايه

    السلام عليكم
    مجهودك مشكور جدا ومعلش هتعبك بسؤال
    انا شقتي عملتها محارة وضهارة وفاضل علي البياض
    وبفكر اعملها بنفسي عشان عندي خبرة بسيطة في الموضوع ده
    هو انا ممكن اسحب سكينة معجون علي الضهارة ولا تشقق وده هيبقي في جنب واحد من الشقة عشان في ضهره مفيش محارة وبينشع مايه في الشتا
    ولو ينفع يبقي احط معجون ايه مقاوم للمايه

    السلا عليكم . لو سمحت بعد إذنك كنت عايزه أعرف طريقة اادهان على الضهاره و تكون النتيجه مرضيه . مع العلم إني هعملها بنفسي .. وشكرا جزيلا لحضرتك
    أ.بسمله

    السلام عليكم ورحمة الله وبركاته
    لو سمحت يا باشمهندس عندي استفسارين من حضرتك بعد اذنك عندي جدار شرب مياه بسبب الجار والدهان عندي قشر زي مابنقول ايه الحل فيه ؟
    الامر التاني ايه افضل اساس علي المحاره من سيلر ومعجون يكون ضد المياه ؟
    وعذرا علي الاطاله .
    شريف الغريب

    إرسال تعليق

    شاركها مع اصدقاءك

    Related Posts Plugin for WordPress, Blogger...

    صفقات رائعة

    أحدث الديكورات 2010

    Twitter Delicious Facebook Digg Stumbleupon Favorites More