25‏/12‏/2011

سلسلة تعليم دهانات المنازل المجانية (الجزء الثانى) | The Best Way to Paint Interior Walls Part 2

اهلاً بكم من جديد ، بعد ما تعلمنا طريقة عمل معجون للحوائط فى الجزء الاول من سلسلة تعليم دهانات المنازل نتكلم فى هذا الجزء عن كيفية عمل الدهان الاولى او البادىء او كما يسمى البطانة و هنا لك مطلق الحرية فى اختيار نوعية الدهان (الطلاء) من حيث الثمن و الصنف و لكنى افضل ان استخدم خليط من بلاستيك ديرتون 777 او سايبس مع اى بلاستيك اقتصادى و ليكن مثلاً سوبر دايتون من GLC او 666 من باكين و اذا كان هناك سيلر فليضاف اليه بشرط ان اصفى هذا الخليط بشراب حتى يصبح خالى من اى شوائب ، و فى السطور التالية سنشرح بالتفصيل كيفية اداء عملية الدهان الاولى (البطانة) للحوائط (الجدران) ، هيا بنا....

سلسلة تعليم دهانات المنازل المجانية

طريقة دهان الحوائط بعد الصنفرة...   

اذا كانت اخر سكينة معجون هى الثالثة فلنستعمل صنفرة 120 اما اذا كانت السكينة الرابعة او الخامسة فلنستعمل صنفرة مقاس 180 و الزوايا و فوق الوزرة 120 و بعدما ننتهى من عملية الصنفرة المجهدة تماماً - و التى يكرهها كل من يعمل بمجال الدهانات (النقاشة) - نقوم بتنظيف الجدران بمكنسة يدوى (مقشة) او بلور اذا امكن و من ثم نكنس الارضية و نجهز المكان لعملية الدهان الاولى(البطانة) ثم نمزج الخليط الذى تحدثنا عنه بالشطر الاعلى من الموضوع و نخففه جيداً و نصفيه بجوارب شراب يعنى لازالة الشوائب ، و نستعمل عدد 2 رول و يقوم بعملية الدهان 2 من الفنيين لماذا لأن الحائط فى اول طبقة دهان يمتص الطلاء بسرعة مما يجعل به لحمات و لكى نتفادى تلك العملية و نصنع حباية رولة ناعمة اتبع الخطوات التالية بالترتيب...

1- نظف الحائط جيداً من الغبار و الاتربة و مما نتج من عملية الصنفرة.
2- خفف البلاستيك جيداً حتى يعطى حباية و مملس شبه ناعم يساعد عند تلقيط الحائط بالمعجون بعد البطانة و البلاستيك يطلق عليه فى الكويت و بعض الدول العربية اصباغ ايملشن و من ثم صفيه.
3- استخدم 2 رول واحدة لتوزيع الدهان و الاخرى للمس و يفضل ان تكون الاولى ذات شعر غزير فتل يعنى و الثانية ذات شعر نحيل اى مقطوط و تكون غالباً صوف كما نقول.
4 - ينفذ هذه العملية اثنان واحد يوزع و الثانى يمس من بعده و لا يهم ان تطلى الاركان لأننا سنطليها فيما بعد مراراً و تكراراً ، فهذه الطبقة من الطلاء الهدف منها ان يتشرب الحائط بالدهان و يعزل المعجون لنقوم بعد ذلك بعملية التلقيط و التى سنتكلم عنها فى السطور القادمة باستفاضة
ملحوظة اذا كنت تكره عملية الصنفرة و لديك بعض المال الذى تود ان تنفقه فى شىء يفيدك و يوفر عليك و يرحمك من عملية الصنفرة المجهدة و اذا كنت تحب ان تطور من نفسك فانصحك بقراءة هذا الموضوع و هو
 

طريقة تلقيط الحوائط بالمعجون بعد الدهان الاولى البادىء او البطانة....        


فى اليوم التالى بعد ان اخذنا دشاً جيداً و شربنا لتر لبن لننظف رئتنا كما نظفنا حوائط المنزل سابقاً نأتى للشغل الذى اسميه بداية الشياكة فى هذه المرحلة استخدم الاضاءة (اللمبة يا معلم) و ما ادراك ما اللمبة ، طبعاً بعدما سحبت 4 سكاكين او 5 سكاكين معجون هتقول الحيطة بقت فل ، اضرب اللمبة على الحائط و شوف البلاوى ، شفت الشغل لا تحزن و لا تيأس معلش العيب فى السكينة مش فى الصنايعى ،ارمى سكينة المعجون و استخدم الصلبة و للذين لا يعلمون ما هى الصلبة استخدم سكينة معجون رقيقة الشفرة مرنة و حادة للتلقيط حتى لا تترك لحام و فى التالى سنبين النقاط المهمة...

1- اغلق النوافذ لتجعل الغرفة التى ستقوم بتلقيطها بالمعجون مظلمة و من ثم استخدم لمبة(مصباح كهربائى)  و اربطها فى خشبة مثلاً كالزانة و تكون اللمبة موصولة بسلك لتتحرك بها و هى فى يدك و سلط الضوء على المكان الذى ستكشف عليه فى الحائط و اهتم بالأماكن التى بها اسبوت او ابليك و خاصةً الغرف التى بها بيت النور و السقف المعلق و المصباح او اللمبة ستكشف لك ادق العيوب و الديفوهات التى يجب ان تعالجها قبل التشطيب او يمكنك شراء
2- يجب تخفيف المعجون بالبلاستيك الخام مثلاً حتى لا يكون غليظ القوام و يترك لحام يتعبك فى الصنفرة فنحن لا نريد ان نقوم سوى بصنفرة بسيطة.
3- فوط التلقيط جيداً اى اذا سحبت عرض فمس بالسكين طول و العكس.

الآن و قد اصبحت الحوائط جاهزة للتشطيب اى لعملية الطلاء الثانية و الثالثة و التى سنشرحها فى الدرس القادم ان شاء الله اترككم فى رعاية الله و الذى لديه اى تعليق او اضافة او استفسار فلا يتردد بالاتصال بى او يترك تعليقه بالاسفل فى المكان المخصص لذلك ، ارجو ان اكون قد اضفت شيئاً و لو بسيطاً لكيفية عمل دهان الحوائط .

24 comments:

لو سمحت انا دلوقتى حجرت نومى كانت محارة اديتها 3 وشوش معجون سايبس و واقف على الدهان و انا عاوز ادهينها بلاستيك ابيض ممكن تقولى فى خطوات مختصرة ايه اللى اعمله و سماء الحاجات اللى هاشتريها و عندى السقف مصيص عاوز برضو خطوات مختصرة و اسماء الحاجات اللى هاشتريها

بستلة بلاستيك ديرتون 777 لو حابب تخلى الدهان مطفى او 888 لو حابب يكون الدهان لامع تشترى جالون منه فقط و يمكنك ان تسال صاحب محل الدهانات عن الكمية حسب مساحة الغرفة اما الخطوات فبعد الصنفرة و تنظيف الحائط من غبار الصنفرة فابدأ بدهان طبقة(وش) بلاستيك مط خفيف ثم بعدما يجف تماما اطلى الحائط بوش تانى ثم ثالث ان لم يغطى اما اذا احببت تفاصيل اكثر اتصل بى على 01226320480

يا ريس انا جبت سايبس 700 و وانا بدهن السقف بالرولة فى حتت من الدهان و انا بدهن بتقشر بعد ماتدهن علطول و السقف مصيص ايه السبب ؟ ؟

وفى سوءال تانى ياريس هو طبيعى ان يكون الحائط بالمعجون انعم من بعد دهان البلاستيك ؟ ؟

بالنسبة للسؤال الاول يا ريس@@@
لو المصيص قديم يبقى اكيد زفر او ضعيف او لم تنظف السقف جيدة من الاتربة او هناك رطوبة اسباب كتير الحل انك تيجى على المناطق الضعيفة دى و تقشرها و تمعجنها بمعجونة و جبس و تسيبها تنشف و بعدين تدهنا على قدها برول صغير و بالراحة سايسها يعنى او لو عايز علاج سريع يبقى تدهن المناطق اللى قشرت بفرشاه ،لكن لو مناطق كتير قشرت يبقى لازم تصنفر السقف و تديله سانيتون و ده طبعا بعد ما تمعجن المناطق اللى قشرت زى ما وصفتلك

بالنسبة للسؤال الثانى@@@
لأ طبعا البلاستيك المط خشن و خصوصا لو بتدهن بالرول و البلاستيك النصف لامع انعم من المط و لكن الخشونة سببها الرول ، دهان الزيت هو الانعم و ان كنت لا افضله فقد اصبح شبه منقرض.

نشكر مجهوداتكم الرائعة وسؤالي هو لو عايز اجدد دهان الشقة عندي هي كانت دهان زيت بس قديم ... ما هي الخطوات ...؟؟

شكرا على مجهودكم الرائع,انا عندى باب كان واخد وش سلون و اديته وش معجون لاتكس سايبس
هل بعد كده ادهنه وش بكين سفير بنى مثلا ؟
و لو عاوز اخليه بنى محروق محمر احط عليه ايه ؟

من فضلك انا عايزادهن الصاله لون بينك وهي اصلا مدهونه دهان قديم خشن
ينفع اعمل البطانه معجون سوبر الممتاز وبعد كدا ادهن بلاستيك

بالنسبة لاعادة طلاء الشقق المدهونة بالدهان الزيتى القديم يجب عمل صنفرة ثم بطانة لاكيه مط عالى الجودة ثم تلقيط بالمعجون و قبل كل هذا اصلاح الشروخ و المرمات اى الاماكن التالفة و المكسورة و يمكن عل التلقيط قبل الصنفرة...ثم تتبع خطوات الدهان المشروحة فى هذا الموضوع http://dekorat.blogspot.com/2012/05/best-way-to-paint-interior-walls-part-3.html
----------------------------------------------
بانسبة لسؤال الباب ***
يجب طلاءه بعد صنفرة المعجون بلاكيه مط ثم طلاءه بأى نوع لاكيه لامع او نصف لامع وكما تحب..
----------------------------------------------
بالنبة للسؤال الثالث ...
ما هو نوع الدهان الخشن هذا (ارجو الاجابة حتى استطيع شرح ما سيتم عمله)
و معجون سوبر الممتاز لا يمكن طلاءه او عمله الا على الحوائط الاسمنتيو ز البسية بمعنى انه لا يمكن سحبه على حائط سابق الطلاء اما اذا اردت فعل ذلك مثلاً على حائط كومبليكو فيجب عليك اضافة معجون اكريلك جى ال على خليط معجون الممتاز او سوبر الممتاز او سافيتو او اى معجون جبسى..
كما يمكنك الاطلاع على هذا الموضوع المتعلق بكيفية استخدام معون سوبر الممتاز
http://dekorat.blogspot.com/2011/06/blog-post.html

السلام عليكم انا نفسى اعمل غرفة أطفالى بس مش عارفه اعمل الموجة ازاى؟ هل بباترون ورق الصقه على الحئط ام هناك طريقه اخرى؟وياترى ماهى الاوان الحديثه للاطفال وجزاكم الله خيرا

و عليكم السلام و رحمة الله و بركاته...اهلاً بكى سيدتى
استخدمى قطعة طباشير و ارسميها بايديكى ثم لونيها كما تشائين و استخدمى فرشاة مستعملة او فرشاة رسام عريضة و المهم هو الحفاظ على تحديد و انسيابية الشكل.

انا عايزه ادهن شقه كانت متبيضه قبل كده بس هيا فيها شقوق كتير وكبيره قالولى انها تريح مبانى ممكن حضرتك تقولى ازاى اعالج الشقوق دى وعايزه اعرف الخطوات الى اتبعها علشان ادهنا؟ والكميات بعد اذنك هيا فيها غرفتين 4x3.5 & ريسيبشن 7x4 ياريت حضرتك تفيدنى

اجابة سؤال الاستاذة الفاضلة بتاريخ 9 سبتمبر..
-----------------------------------------
بالنسبة للشروخ اقرأى هذا الموضوع الخاص بالشروخ
http://dekorat.blogspot.com/2011/03/how-to-address-wall-cracks.html
-----------------------
بالنسبة لطريقة الدهان اقرأى هذا الموضوع
http://dekorat.blogspot.com/2012/05/best-way-to-paint-interior-walls-part-3.html
--------------------------------
هناك ايضاً مشاكل قد تقابلك اثناء عملية الدهان و يمكنك حلها من خلال قراءة هذا الموضوع
http://dekorat.blogspot.com/2012/01/blog-post_24.html
--------------------------------
و طريقة اعادة دهان الحوائط السابق طلاءها ايضا موضوع ربما يفيدك يمكنك قراءته من هنا
http://dekorat.blogspot.com/2012/08/how-to-repaint-old-wall.html
--------------------------------
اما بالنسبة للكميات فارجو ان توضحى لى اكثر ما هى نوعية الطلاء الذى ترغبين فى تنفيذه على جدران شقتك؟
هل هو لاكيه ام بلاستيك و فى كلتا الحالتين هل هو مط ام لامع ام نصف لامع؟
و ما هى حالة الحوائط هل هى سيئة ام جيدة ام تحتاج فقط الى تغير الوان؟ بمعنى متى سبق طلاءها و ما هو نوع الدهان الموجود على جدرانها؟ هل هى تحتاج الى طلاء معجون؟ اسئلة كثيرة يجب ان تحدديها انتى....!

انت باشاوالله .. انا عاوز اعمل جنب كروهات وجنب دوائر وجنب حجارى فرعونى يعنى ارجو الافاده

برافو على مجهودك يا هندسه انا صنايعي خبره لو احتجتني معاك بشغل تحت امرك بمصر وخارج مصر ت 01115192506 القاهره

لو سمحت ازاى اعالج الشقوق بالحوائط بعد ما بمعجنها يتشقق تانى

ده موضوع عن الشروخ و علاجها ارجو ان يفيدك
http://dekorat.blogspot.com/2011/03/how-to-address-wall-cracks.html

لوسمحت انا عملنا فى شقتنا سكينه معجون بلدى والنقاش كان جايب سانيتون وهبو بس حصل مشاكل ومش هيشتغل فالنقاش اللى جبته قالى مش عايز الحاجات دى وهنعمل تلقيط وانا مش عارف ايه الصح اللى الاولانى كان هيعمله ولا التانى ومش عارفه احاجات اللى جبها دى فايدتها ايه ارجوك تفهمنى لانى مش عارف اصرف

اخى الكريم انا كنت شغال في تشطيب الشقة من حوالى 3 سنوات بس لظروف السفر سيبتها كنت وصلت لمعجنة الحوائط السكينة الثانية و السقف لم يمعجن بس لاحظت انى لما بمشى بايدى على الحائط شاعر ان المعجون بيطلع زى ما يكون جير و انا بفكر ادهن بنفسى فتنصحنى باية و ارجو بالتفصيل لانى هجرب في الحجرة الصغيرة الاول لو الموضوع نجح هكمل في الشقة و ربنا يستر و ياريت تقولى الادوات باسمائها بالظبط اللى هنزل اشتريها مش عايز حد يشتغلنى

لى استفسار واتمنى النصيحه انا شقتى على المحاره والسقف بيوت نور والعامل اثناء تركيب بيوت النور غطى اكثر من عمود بالجبس بس مش كلهم ربعهم كدة من بعد الكرانيش وطبعا تخانه الجبس على العمود 3 سم مثلا وباقى العمود من تحت محاره فهل اكسر الجبس ولا ادهن على كدة وثانيا انا دهنت الكرانيش والسقف سيلر فهل لازم ادهنه تانى سانيتون ولا كفايه وشكرا

أخى الكريم أنا محتاج أعرف إزاى أعالج تكسير الكهرباء بعد المحاره وغلق خطوط الكهرباء بالأسمنت وطبعا شكله مش متساوى أعمل إيه قبل المعجون وللعلم دى أبليك ياعنى النور ضارب فيها

دلوقتى انا سحبت الشقه سكينة معجون بلدى وسبتها سنتين وبعدين رجعت سحبتها السكينه التانيه والتالته معجون جاهز المشكله دلوقتى انى لما بمشى ايدى على الحوائط بلاقى الحوائط زى ماتكون بطلع بودره زى الجير كده فهل والمعجون بيتقشر بمجرد انى بعملو بضوافرى هل كده المعجون يبقى ضعيف ولو المعجون ضعيف ايه الحل علشان اقوى المعجون ويصلح للتشطيب

اخي الكريم احتاج الي ان اعرف ما هو الكمبليكو وكيفيه استخدامه والادوات الامستخدمه وهل هو لون واحد ام الاوان مختلفه

لو سمحت أنا شقتي مدهونة زيت قديم وعايز ادهنها زيت جديد ، لازم أصنفر؟ وهل الصنفرة اخشن بيها الحيطة بس ولا ازيل طبقة الزيت كلها وايه الخطوات بعد كدة؟

إرسال تعليق

شاركها مع اصدقاءك

Related Posts Plugin for WordPress, Blogger...

أحدث الديكورات 2010

Twitter Delicious Facebook Digg Stumbleupon Favorites More